Öndvegisganga um Öndverðarnes

Hótel Langaholt býður þann 23.maí næstkomandi upp á dagsgöngu með kvöldverði og gistingu með morgunverði. Gengið er í ysta hluta Snæfellsjökulsþjóðgarðs með fararstjóra sem jafnframt er fyrrverandi landvörður í þjóðgarðinum. Áhersla er lögð á fræðslu og skoðun fornminja sem eru utan alfaraleiða og fjölmennustu viðkomustaða ferðamanna. Um er að ræða létta göngu með lítilli hækkun sem hentar göngufæru fólki á öllum aldri.

Dagurinn hefst á því að mæting er í Langaholti um 9 um morguninn þar sem dagurinn byrjar á stuttu kaffi og samtali um daginn, en meðal annars þarf að skipuleggja bílferðir. Frá Langaholti verður hópurinn samferða á upphafsstað göngu, en lagt er upp með að ganga hring á Öndverðarnesi, yst á Snæfellsnesi.

Göngusvæðið afmarkast af Skarðsvík, Öndverðarneshólum og Skálasnagavita. Mikið er af minjum á svæðinu og sjávarsíðan stórbrotin. Nesgatan sem liggur gegnum hraunið er ein af skemmtilegri hraungötum á landinu.

Búast má við 13-16km göngu með lítilli hækkun, og 7-8 tímum af útivist.

Gangan er samstarfsverkefni með Tindum Snæfellsness og fararstjóri er Guðmundur Rúnar Svansson.