Gistirýmum að Langaholti fjölgað um helming í vetur

Framkvæmdir eru hafnar við að stækka gistihúsið að Langaholti í Staðarsveit á Snæfellsnesi um helming. Fjölgað verður í gistirými um 20 herbergi, stækkað úr 20 í 40 herbergi. Fyrsta skóflustungan að framkvæmdunum var tekin á miðvikudag í síðustu viku. „Já, við erum aðallega að fara að bæta við herbergjum, auka gistirýmið. Þessi 20 nýju herbergi til viðbótar við þau 20 sem eru fyrir verða í húsi samtengdu við gistihúsið sem er fyrir. Nýja byggingin á að verða tilbúin sem fyrst. Ég var að lesa í Skessuhorni að ferðaþjónustan sé orðin aðal bransinn svo það er ekki seinna vænna, sagði Keli vert, Þorkell Símonarson í Langaholti, þegar Skessuhorn náði tali af honum í önnum við að grafa fyrir grunni nýja hússins. „En við áætlum að ná að ljúka þessu fyrir næsta sumar.“

Herbergin í nýju gistiálmunni verða öll tveggja manna með baði. „Það verða öll nútíma þægindi eins og kröfur eru til í ferðaþjónustunni í dag. „Það er gaman að hugsa til þess að elsti hluti gistihússins hér er frá 1985 eða 30 ára. Það var sérbyggt yfir ferðamenn og ekki mörgum sem datt það þá í hug í sveitum landsins að reisa gistihús fyrir ferðamenn. Nú 30 árum síðan er þetta hins vegar orðin þörfin, 40 herbergi í Langaholti. Sumir segja reyndar að við hefðum átt að stækka enn meira við okkur í þessum áfanga. Það er búið að vera vitlaust að gera, mikill ófriður af ferðamönnum,“ segir Keli og hlær dátt. „Sumarið var mjög gott, eins og reyndar síðustu sumur einnig.“