Láglendisganga á laugardegi frá Dritvík að Malarrifi

Hótel Langaholt býður þann 31. maí næstkomandi upp á dagsgöngu með mat og gistingu í syðsta hluta Snæfellsjökulsþjóðgarðs. Leiðsögumaður er Guðmundur Rúnar Svansson sem starfað hefur sem landvörður í þjóðgarðinum. Áhersla er lögð á fræðslu og skoðun fornminja sem eru utan alfaraleiða og stærstu viðkomustaða ferðamanna.

Dagurinn hefst á því að mæting er í Langaholti um 9 um morguninn þar sem dagurinn byrjar á stuttu kaffi og samtali um daginn, en meðal annars þarf að skipuleggja bílferðir. Frá Langaholti verður hópurinn samferða á upphafsstað göngu, en hluti bílanna verður skilinn eftir á bílastæðinu við gestastofuna á Malarrifi.

Gangan hefst á því að gamla vermannagatan verður gengin í Dritvík, en það er ómerkt og fáfarin hraungata en þó vel sýnileg í hrauninu. Frá Dritvík verður gengið í námunda við sjávarsíðuna um Djúpalónssand, Einarslón og Þrælavík að Malarrifi, og jafnvel að Lóndröngum og Svalþúfu eftir því hvað tími og veður leyfa.

Búast má við 13-16km göngu með lítilli hækkun, og 7-8 tímum af útivist, en á köflum um hrjóstug og mishæðótt hraunlandslag sem getur verið þungt á fótinn. Gerð er krafa góðan útivistarfatnað sem er vind- og vatnsheldur, og gönguskó með góðum ökklastuðningi.

Að lokinni göngu verður sameiginlegt borðhald á Langaholti.

 (Lágmarksfjöldi fyrir gönguhóp er 8 manns)